Sigurður Guðmundsson

18.2.2009 | 19:16

Stórsigur fyrir Ísland

Það er engum blöðum um það að fletta að dagurinn í dag lætur silfurdrengina frá því í fyrra falla í gleymsku. Loksins var tekin ákvörðun sem ekki er menguð af áliti heimsins eða umhverfissinna varðandi hvalveiðar. Hvað með það þó nokkrar tugmilljónir manna séu ekki okkur sammála. Við erum sjálfstæð þjóð þar sem drullan rennur niður bak okkar vegna þess að ljótu útlendingarnir voru of viljugir að lána okkur pening. Svei þeim að þeir skuli dirfast að setja út á ákvörðun okkar ástkæru ráðamanna. Til að sýna þeim hvað í okkur býr er ekkert nema sjálfsagt að skera hvalinn á lækjartorgi þannig að blóðið geti lekið fyrir augum túrista sem álpast hingað fyrir einhvern misskilning, við höfum ekkert að gera með peninga einhverra ferðamanna sem skapa nokkur þúsund störf. Gróðinn af hvalveiðum er ekki mældur í milljónum eða milljörðum, hann er víst eitthvað minni.

Þessi svokallaði ferðamannaiðnaður er nú varla atvinna, gamlar kerlingar að reyna að selja götótta sokka og peysur sem enginn af ættingjunum vill ganga í. Þó ekki væri nema hvað manni klæjar af ullinni. Nei frekar viljum við sjá stórauknar hvalveiðar og þá ekki einhverjar 150 skitnar skepnur 1500 væri nær lagi. Það vita allir sem vilja vita að hvalurinn er einhver sú hættulegasta skepna jarðarinnar, étandi fiskinn okkar og við skulum ekki gleyma Moby Dick, saga sem ætti okkur öllum að vera víti til varnaðar. Hver er búinn að gleyma Jónasi í hvalnum EKKI ÉG.

Allur fiskurinn í sjónum er í stórfelldri hættu útaf hinum gríðarlega gráðuga hval. Fiskmagnið hér áður fyrr þegar hvalur var veiddur var með ólíkindum, ég gekk eitt sinn á þurrum fótum á baki þorska yfir Eyjafjörð því torfan var svo þétt. Þessu trúir væntanlega enginn en svona var þetta hér áður fyrr. Það er enginn vafi á því að fiskmagnið í sjónum hefur minnkað og það er hvalnum að kenna sem leiðir líkur að því að skuldsetning útgerðarinnar er hvalnum að kenna líka. Rökrétt niðurstaða hlýtur að vera að ef við hreinsum aðeins til í hvalastofnum þá minnka skuldir útgerðarinnar.

450 milljarðar verða væntanlega orðnir rúmir 12 milljarðar í lok árs.

Lifum heil og verum bjartsýn